Haiti International Pageants 2016 : Gayant yo

Final konkou Haiti International Pageants 2016 la te fèt samdi swa. Pandan sware sa a ki te fèt nan Randolph (eta Maschisèts nan peyi Etazini),  Lulu Orange te eli Mrs Haiti International 2016, Nupsie-Flore Exantus te eli Miss Haiti International 2016 epi Rebecca Noelle Zama, Miss Teen Haiti International 2016.  Premiye dofin Mrs Haiti International 2016 se Monique Gosling alòs ke Kenicha Dorvil sòti premye dofin Miss Haiti International 2016.

Gyant "Haiti International Pageants 2016" yo ak Miss International 2015, Elise Banks - Foto: Mrs, Miss and Miss Teen International Pageants

Gyant "Haiti International Pageants 2016" yo ak Miss International 2015, Elise Banks - Foto: Mrs, Miss and Miss Teen International Pageants

Se toujou yon bèl bagay lè w wè medam yo k ap patisipe nan konkou bote.  Men se gwo zafè lè moun ki genyen yo non sèlman bèl, men yo se fanm entelijan tou.

Lulu Orange Tyson - Sous foto a:  Lulu Orange Inc.

Lulu Orange, Mrs Haiti International 2016, fèt nan Sid Florida (Etazini).  Paran l  sòti Okap. Li ranpòte plizye pri nan konkou bote ak nan sektè kominikasyon an deja.   Li gen yon diplòm Infimiyèz ak youn nan Kominikasyon.  Li se yonprezantatris ke moun ka wè ap fè kòmantè nan gwo evenman sou mòd ak konkou bote.  Mari l rele Charlie Tyson.  Pa gen lontan depi Lulu Oranj kòmanse pwòp cho televizyon pa l ki rele “Oj in the Morning with Lulu Orange ».  Depi kèk tan tou, li prezante yon show ki rele “ The Boardroom TV Show” kote li ap sèvi ak kèk gwo responsab antrepriz ki rive byen wo nan domèn ke y ap evolye a pou li ka ede lòt fanm ak gason swiv tras moun sa yo.

Nupsie-Flore Exantus , Miss Haiti International 2016 - Foto: Garçon Photography

Nupsie-Flore Exantus, Miss Haiti International 2016, se moun Gonayiv.  Li se yon moun ki genyen yon relasyon spesyal ak jèn ke moun maltrete.  Se nan ane 2011, pandan li tap travay nan yonkote yo pran timoun ki pa gen kay pou yo rete, ke li te dekouvri tout sa move tretman ka fè sou yon jèn ki gen pou l vin yon granmoun yon jou.  Se depi lè sa a li bay tèt li misyon pou li fè tout sa li kapab pou l ede timoun yo gen konfyans nan tèt yo, vin djanm epi aprann yo dekouvri sa yo genyen ki bon lakay yo.

Rebecca Noelle Zama - Sous Foto a:  paj Facebook @Rebecca Noelle Zama

Rebecca Noelle Zama, Miss Teen Haiti International 2016, se yon atis ki gen 18 an ki fèt nan vil Washington nan peyi Etazini.  Manman l se moun Lazil (Depatman Nip). Li pale franse, kreyòl ak angle kou rat.  Se depi lè li te gen 3 lane ke li te dekouvri li renmen chante ak mizik.  Apre tranblemandtè ki te frape peyi d’Ayiti a, an 2011 alòs ke li te gen 13 lane, li te pibliye yon liv pwezi ki rele “Optimum Me !”.  Benefis liv la ede l jwenn lajan pou fè zèv nan peyi D’Ayiti.  Kounye a, Rebecca Zuma se yon chantèz pwofesyonèl ak yon moun ki ap ekri chante.

Se tout bèl fanm sa yo ki pral reprezante nou 22 ak 23 jiyè (pou Mrs International) epi 28 rive 30 jiyè (pou Miss ak Miss Teen International) nan konkou ki rele “Mrs, Miss and Miss Teen International” ki gen pou fèt nan Jaksonvil nan eta Florida (Etazini).